Volven as escolas municipais… e traen novidades

O Concello retomará a partir do mes de outubro a súa oferta de escolas deportivas para todas as idades. En total hai dispoñibles dez propostas repartidas case a partes iguais entre actividades para a rapazada e as dirixidas a adolescentes e persoas adultas. Porén, ademais de promover a práctica deportiva, o Concello tamén quere darlle pulo á aprendizaxe relacionada coa Cultura. O prazo de inscrición en todas elas está aberto durante este mes co obxectivo de ir enchendo os grupos e poder comezar as clases na primeira quincena de outubro. 

Os obradoiros culturais que se van desenvolver terán un carácter estacional. O primeiro deles vai para nenas e nenos e estará centrado na cestaría, pero haberá máis adiante outros relacionados coa cociña e a repostaría. Ademais, desde a área de Cultura tamén se está traballando para poñer en marcha a Escola Municipal de Teatro aberta a todas as idades. Destas novidades informarémosvos puntualmente a través da web, das redes sociais e deste mesmo boletín a medida que vaiamos concretando a súa programación.

Onde si podedes inscribirvos desde xa mesmo é nas actividades habituais para exercitar o corpo e incluso a mente. De feito, o Concello tamén reedita entre outubro e xuño os obradoiros de memoria para persoas maiores, cos que se pretende manter esperta a cabeza con xogos físicos e cognitivos.

O catálogo completo de actividades xa pechadas é o seguinte:

Cando empezan e cando hai que pagar?
Todas estas escolas e obradoiros comezarán a partir do 15 de outubro e a confirmación e pagamento das cotas poderá facerse do 3 de outubro en diante. Os obradoiros de memoria empezarán o día 3.

Onde me apunto?
Para inscribirse nas escolas de deporte fai falla contactar co técnico da área a través do teléfono 981 404 006 ou enviándolle un correo á conta daniel.feijoo@moeche.gal. O técnico atende de luns a venres entre as 9 e as 14.00h. e, despois do 16 de outubro, só os mércores e venres de 11 a 14.00h.

Para informarse sobre as actividades culturais ou apuntarse nos obradoiros de memoria é necesario chamar ao Concello, pasar por alí ou remitir un correo á conta xeral correo@moeche.gal.

Que documentación teño que presentar?
O alumnado que empece por primeira vez nas escolas deberá achegar a fotocopia do DNI e o xustificante de ter pagado o prezo público cando se lle confirme a praza. Ademais tamén hai que entregar debidamente cuberta a folla de inscrición, dispoñible nas ligazóns que hai ao pé desta nova ou na Casa do Concello. Para as actividades deportivas tamén fai falla presentar a copia da tarxeta sanitaria. Quen xa participase nas escolas o ano pasado só terá que presentar a solicitude e o xustificante bancario do pagamento.

Canto custa?
Os prezos das actividades veñen recollidos na correspondente ordenanza fiscal, que mantén as contías con respecto a outros anos. Están determinadas segundo as horas de duración de cada escola e prevense descontos desde un 15 ata o 100% naquelas impartidas directamente polo Concello, sempre e cando se cumpran os requisitos reflectidos na ordenanza.

Documentación descargable
Folla de inscrición en Movémonos
Folla de inscrición nas escolas deportivas infantís
Folla de inscrición nas escolas para persoas adultas e Maiores+
Folla de inscrición na escola de atletismo
Folla de inscrición en Pilates
Folla de inscrición en Spinning
Folla de inscrición en Zumba