MOECHE: CONCELLO AMIGO DA INFANCIA

Moeche é un Concello Amigo da Infancia – O proceso
Un Concello Amigo da Infancia é calquera cidade, vila, aldea, comunidade ou sistema de goberno local comprometido co cumprimento dos dereitos das nenas, dos nenos e das persoas adolescentes de conformidade coa Convención sobre os Dereitos da Infancia.
Debe converterse nun concello onde as necesidades, as prioridades e os dereitos das nenas e dos nenos constitúan un dos eixos das políticas, dos programas e das decisións públicas. Os gobernos locais identifican una serie de metas para acadaren no ámbito dos cinco obxectivos marco da iniciativa:
As voces, necesidades e prioridades de cada neno e nena escóitanse e considéranse nas normativas e políticas públicas, nos orzamentos e en todas as decisións que lles afectan.
• Cada neno e nena é valorado, tratado e respectado xustamente dentro da súa comunidade.
• Todos os nenos e nenas teñen acceso a servizos esenciais de calidade.
• Todas as nenas e nenos teñen a oportunidade de gozar da vida familiar, do xogo e do lecer.
O programa Concellos Amigos da Infancia é unha iniciativa liderado por UNICEF en máis de 30 países, incluído España, que apoia aos Gobernos municipais nos seus esforzos por facer realidade o seu compromiso cos dereitos de infancia.
En agosto de 2017 o pleno municipal acordou adherirse ao selo de UNICEF e dous meses despois aprobouse a configuración que tería o Consello Local da Infancia e a Adolescencia -CLIA- e maila Mesa de Coordinación Interna de Participación Infantil, encargada de estruturar a participación e de levar ao papel tanto a diagnose da situación de partida como o plan de actuacións, nutrido en boa parte polas achegas expresadas nos plenos polos nenos e nenas.
O 7 de maio de 2018 presentou a súa candidatura e o 26 de outubro do mesmo ano, coñeceuse a decisión de UNICEF Comité Español e outras entidades responsables -Ministerio de Sanidade, Consumo e Benestar Social, FEMP e o Instituto Universitario de Necesidades e Dereitos da Infancia e a Adolescencia- de elixir a candidatura de Moeche como unha das Cidades Amigas da Infancia. Un mes máis tarde, Moeche recibía nun acto na cidade de Oviedo o distintivo de “Cidade Amiga da Infancia”.

Documentos de traballo da candidatura:

• • Plan local da infancia (Ver) / (Descargar)
  • Documento diagnóstico Moeche (Ver) / (Descargar)

Consello Local da Infancia e Adolescencia (CLIA)

En  novembro de 2017 o Concello de Moeche aprobou en sesión plenaria a constitución do seu Consello Local da Infancia e Adolescencia, o primeiro órgano municipal de participación infantil.  Durante o ano 2018 púxose en marcha coa incorporación dos diferentes membros.

• Regulamento CLIA (Ver) / (Descargar)

O Grupo de Participación da Infancia e a Adolescencia – GPIA

O GPIA está constituído, como mínimo, polos nenos e nenas e adolescentes que forman parte do Consello Local da Infancia e Adolescencia.  A este grupo pódense sumar todos os menores de 8 a 17 anos (menores de 18) que residan no Concello de Moeche.

RECOMENDACIÓN PARA A INFANCIA E A ADOLESCENCIA-UNICEF

En UNICEF ESPAÑA seguen traballando durante esta crise para manternos informados a través do seu blog e a páxina web. Deixámosvos os enlaces a algunha das publicacións que vos poden ser de interese e animámosvos a consultar todas as súas publicacións.

Última actualización 29.04.2020

“[…] Moitas cousas cambiaron drasticamente para nenos, nenas e adolescentes coa chegada do novo coronavirus. A súa rutina, o xogo ao aire libre, os espazos de educación, o contacto cos seus compañeiros e familia… Para moitos deles trátase dun cambio crucial: os seus dereitos poden verse ameazados neste novo escenario onde o que prima é vencer á pandemia https://ciudadesamigas.org/covid19-recomendaciones/

“O medo é unha emoción moi pouco valorada. Pero como toda emoción, é útil. Permítenos protexernos e defendernos. E o mesmo pasa coa rabia. Ante esta situación, sexamos conscientes das nosas emocións, identificándoas e compartíndoas. Máis que nunca, agora é importante facer equipo, cos nosos compañeiros e cos propios rapaces e rapazas aos que atendemos. E permitámonos coidar, tamén de forma consciente, de nós mesmos.” https://www.unicef.es/blog-proteccion/vivir-el-miedo-pautas-de-autocuidado

Regularmente van actualizando os contidos na web www.unicef.es/educa onde podedes atopar máis información.

Clip Club TV

Última actualización 27.03.2020

Dende UNICEF fannos chegar información dunha iniciativa chamada CLIP CLUB TV, “unha canle de Youtube onde os protagonistas son os nenos, nenas e adolescentes a través dos seus propios vídeos, nos que nos contan como están a vivir o confinamento en casa. UNICEF Comité Español e  Alcantara  Family  Foundation lanzamos esta proposta para toda España co obxectivo de facer máis visible a infancia e a adolescencia en momentos como este e contribuír a que poidan pasar mellores intres”.

E queren propoñervos algúns exemplos para participar:

• Se liches un libro, película ou serie de Youtube ou TV que che guste moito, queremos que nolo recomendes
• Que música estás a escoitar estes días para poñerche de bo humor?
• Se inventaches un xogo e queres que outros nenos e nenas o coñezan, cóntanos como funciona
• Es cocinillas? Se fixeches unha receita de cociña fácil e divertida, compártea!
• Se crees que aínda hai mozos e mozas que non saben como lavarse as mans, pódesnos facer unha demostración da túa técnica máis depurada.
• E o teu pai ou a túa nai, como se están comportando estes días en casa? Cóntanolo!

E así con moitísimas cousas: coreografías e bailes, exercicios que fas na habitación, debuxos experimentais, contos inventados, manualidades, xogos de cartas, origami, trucos de maxia…

Seguro que tes algún talento escondido e, se o compartes, podes entreter a moitos mozos e mozas.

Instrucións para que os vídeos queden moi profesionais!
– Grávate co móbil, a tableta ou o computador.
– Faino en formato horizontal
– Procura que ao teu ao redor non haxa moito ruído, así poderemos escoitarche mellor
– Evita o contraluz (non graves de costas ao sol)
– Mira á cámara, pero tenta ser natural, coma se llo explicases a teu pai, nai, irmáns/ as ou amigos e amigas
– Procura que os vídeos non sexan moi longos (como moito, un minuto e medio)
– Encantaranos recibir o teu vídeo, pero non podemos asegurar que se publiquen todos os que se rexistren.

Para subir os vídeos é moi fácil: conéctate a www.clipclubtv.com e cóntalles a túa historia.